Kinta, 28 Marsu 2024
banner_top_2
Notisia
Parseria ho Wikimedia Foundation
Kuarta, 03 Setembru 2014 22:49

Timor Telecom halo parseria ho Wikipedia no oferese dadus móvel ba kliente sira


TT nia kliente sira bele asesu gratuitu ba konteúdu Wikipédia nian.

Timor Telecom (TT) ohin fó sai nia parseria foun ho Wikimedia Foundation, organizasaun ida ne’ebé la iha fundu lukrativu hodi jere Wikipedia no ninia projetu sira ne’ebé asosia ona. Liu husi programa globál Wikipedia Zero, Timor Telecom sei sai hanesan operadór ba dahuluk iha Timor-Leste atu oferese asesu ilimitadu ba site Wikipedia ho forma gratutitu, liu husi dispozitivu móvel sira.

Liu husi maneira ida ne’e, desde TT hahú mosu, nia hatudu hela nafatin katak nia sempre avansadu kona-ba teknolojia, baihira adapta ba kliente sira nia nesesidade, komesa disponibiliza asesu ilimitadu no gratuitu ba Wikipedia ba ema hotu-hotu ne’ebé uza dispozitivu móvel, nune’e hodi kontribui ba liberalizasaunasesu ba konteúdu Internet nian. Parseria ida ne’e sei fó benefísiu ba timoroan sira hotu, espesiál liu ba komunidade estudante nian sira, permiti hodi asesu ba konteudu hirak ne’ebé bele hasa’e tán sira nia koñesimentu, no la presiza selu. Programa Wikipedia Zero iha ligasaun ho estratéjia TT nian atu halo di’ak liu tán ligasaun sidadaun timoroan sira ba mundu, nune’e kontribui ba sosiedade ida ne’ebé informadu no dezenvolvidu liu tán.

Manuel Capitão Amaro, Timor Telecom nia CEO haktuir:

"Nu’udar líder iha merkadu, ami sente kontente tebes ho parseria ida ne’e no halo parte ba projetu globál husi Wikipedia. Ho oportunidade ida ne’e atu oferese konteudu sira ne’e gratuitu ba ami nia kliente no nune’e bele kontribui atu aumenta povu timoroan sira nia koñesimentu, ne’e sai hanesan pasu boot ida no importante ba Timor Telecom, maka durante tinan 12 ajuda barak ba dezenvolvimentu sosiedade timoroan nian”.

"Wikipedia Zero iha impaktu boot iha mundu tomak, lori koñesimentu barak liu tán ba ema sira ne’ebé, laiha dalan atu bele hetan asesu ba ida ne’e", refere Carolynne Schloeder, Directora Parseria Móvel husi Fundasaun Wikimedia. "Ami sente entuziasmu boot atu simu Timor Telecom no sira nia kliente hotu-hotu iha ami nia movimentu ba koñesimentu livre."

Kona-ba Wikipedia

Wikipedia nu’udar ensiklopédia online ne’ebé boot liu, fulan-fulan ema vizita besik rihun 500, konforme dadus sira husi ComScore Media Metrix. Wikipedia ne’e iha artigu rihun 29 maka rezulta husi komunidade globál besik voluntáiru rihun 80.

Kona-ba Timor Telecom

Nu’udar operadór telekomunikasaun ne’ebé bot liu iha Timor-Leste, Timor Telecom (TT) halo operasaun besik tinan 12, servi kliente rihun 600 resin. TT dezenvolve ninia pozisaun hanesan empreza sólida no dinámika, hasoru dezafiu oioin no hodi fó apoiu ba povu Timoroan desde restaurasaun independénsia. Ohin TT sai líder ne’ebé laiha seluk atu kompete iha ninia merkadu, ho rede ne’ebé porntu, ho kualidade di’ak liu, halo di’ak no iha konfiansa, kobre distritu hothotu iha territóriu no nia uzu iha populasaun 94% Timor-Leste.